الطيب أحسن

                                                                                                                                                                                    

نظرت فالمراية كعادتي كل صباح (اللهم كما حسّنت خَلقي فأحسن خُلقي) فطلت إلي بطّلتها المرعبة شخصيتي السوداء تحيّني

- "سلام عليكم, اصطبحنا و اصطبح الملك لله"

- نظرت لي نظرتها التهكمية " اعترفي وحشتيك"

- "ولا عاوزة اشوف وشك اصلا"

- رسمت على وشها نظرة مجروحة متصنعة "بالله عليكي مزهقتيش مالتمثيل و ارضاء الناس وانك تباني أنك البنت الجميلة الحبوبة فحين أني عارفة أن في شوية منهم أنتي عاوزة توّلعي فيهم"

-" مش هديلك رفاهية أني أرد عليكي"

- " طيب والناس اللي أنا وأنتي عارفينهم اللي نفسك تمسكيهم تهزيهم جامد قوي لحد ما يفهموا أو يختفوا؟؟ ومع ذلك لما يكلموكي بتتصنعي الأدب وبتكلميهم باحترام كأنهم أعقل وأكبر ناس فالعالم"

- "أنتي عاوزة مني أي؟؟"

- "عاوزاكي توجعي زي ما بتتوجعي...عاوزاكي قوية, اللي عاوز يجرحك يفكر ألف مرة فأي اللي هيحصله لو جرحك...عاوزة أشوفك بتاخدي حقك بدل ما أشوف قلبك بيعّجز قدام عينيه من عمايل الناس فيه...عاوزة اشوف حقيقتك, مش وش بلاستك بيضحك بتقابلي بيه كل الناس...عاوزاكي تقفي فوش اللي يقلل من شائنك من غير ما تجري تهربي قبل ما دموعك تنزل ويشفوها...عاوزاكي تُحترمي لقوتك, مش لأنك بتستحملي كل اللي بيجي عليكي"

- "أنا قوتي فضعفي...قوتي قوة تحّمل...بعرف أشوف أحلى ما فالناس وابني سد عالي حولين الوحش فميأثرش فيه وحشهم"

- "ولما السد يستحمل اكتر من طاقته ويتصدع ويتهدّ؟؟"

- "هنبنيه تاني, عشان يابخت اللي يبات مظلوم ولا يباتش ظالم, عشان...."

- قاطعتني بحده "وتباتي ظالمة ولا مظلومة ليه؟؟ ماتباتي واخده حقك ومدّيه للناس حقوقها"

- " روحي قولي كده للي بيظلم...ده غير أني بعامل ربنا من خلال الناس ور....."

- "هاه, ده كان زمان لما كنتي واخده نواياه وكده...دلوقتي أنتي حبيسة عادة, لا فاكرة بتعملي كده ليه ولا عارفة تبطّلي"

- "أولا بطّلي تقاطعيني وأنا بتكلم...ثانيا نوايايه ونسيتها وهفتكرها, ملكيش فيه...ثالثا وده الأهم, أنا اللي غالطانة أني بكلم شخصية سودة زيك وعملالها أحترام, صدق اللي قال "إذا أنت أكرمت الكريم ملكته... وإن أنت أكرمت اللئيم تمردا"

بعد ما أثبت للجميع أني شخصية سيكوباتية معقدة...سبت مرايتي بشخصيتي السودة اللئيمة اللي عايشة فيها وقررت أكتب نوايا التعامل مع الناس...أصل فكروا فيها لو هعمل فيها الشخصية الجميلة اللي مبتزعلش, اللي تتكلم حلو وخير حتى لو من جواها ثور هائج يبقى أقل واجب أني اخد عليها حسنات...أصل لو مش هاخد يبقى أطلع كبت السنين...فأنا رأيي "الطيب أحسن"

النوايا:

1) يقول صلى الله عليه وسلم :" إن الرجل ليدرك بحسن خلقه درجات قائم الليل وصائم النهار "

2) ويقول الرسول صلى الله عليه وسلم :"المؤمن يألف ويؤلف ولاخير فيمن لا يألف ولا يؤلف , وخير الناس أنفعهم للناس "

3) ويقول الرسول صلى الله عليه وسلم : "من ستر مسلماً ستره الله في الدنيا والآخرة "

4) ويقول الرسول صلى الله عليه وسلم : " أنا زعيمٌ ببيتٍ في ربض الجنة لمن ترك المراء ولو كان محقاً"

5) والرسول صلى الله عليه وسلم يقول : " أحب الناس إلى الله عز وجل أنفعهم للناس، وأحب الأعمال إلى الله سرورٌ تدخله على مسلمٍ ، تكشف عنه كرباً ، أو تقضي عنه ديناً ، أو تطرد عنه جوعاً ، ولو أن تمشي مع أخيك في حاجته أحبُّ إليَّ من أن تعتكف شهراً"

6)  ويقول الرسول صلى الله عليه وسلم : " من لم يشكر الناس لا يشكره الله"

7) ويقول الرسول صلى الله عليه وسلم : " تبسمك في وجه أخيك لك صدقة "

8)  ويقول الرسول صلى الله عليه وسلم : " ليس المؤمن بالطعان ولا اللعان ولا الفاحش ولا البذيء"

بصوا هي كل الأحاديث صحيحة بس أنا كسّلت أكتب منين وكده

المهم لما حد يستفزكم تاني افتكروا النوايا وادعوا لي =)