فاكر, ولا لازم أفكرك

                                                                                                                                                                                       

دي كانت قصة قصيرة كتبتها بالظبط من تلات سنين لما واحدة من أحب الناس ليه أتجوزت, وهي صحبتي روني, واحدة من 5 بنات (خديجة "خوخا" - مريم "روما" - هاجر "جوجو" -داليا "دولي" - و روني اللي هي رانيا يعني)هما فدماغي أول صحبة صالحة عملتها...علموني كتير وأول حاجة علموهالي كان دعاء لحد دلوقتي بدعوا بيه وشوفت أستجابت ربنا ليهم كلهم فيه

"اللهم أفتح لي بابا من أبواب علمك تفتح لي به باب من أبواب جنتك"

روني بقى كنا مسمينها روني "زيارات", بجد عمري ما شفت حد بيحب يتعرف على الناس و يكلمهم زيها , لها معارف في كل مكان حتى عاليتها البعاد اللي غالباً باباها ماسمعش عنهم حاجه هي تعرفهم و بتزورهم على طول و يا ويل واحدة منا لو زعلت أهلها و روني عرفت. روني بقي هي اللي بتخرجنا يعني أول ما نقول أحنا عاوزين نروح مكان جديد روني بقى : "في دار مسنين جديد ولا تحبوا دار أيتام أو ممكن 57357 ولا تحبوا نخرج أحنا بس نروح الملاهي أو ممكن البرج......." ولو ما أخترناش مكان ممكن تكمل لبكره الصبح بدون توقف. وكان أكبر أحلامها أنها تعمل مركز للصناعات الصغيرة بدل غزو الصين اللي بيحصل ده. 

السبب اللي بيخليني أكتب قصتها النهاردة عالملاء كده, أني عاوزاها هي وزوجها يفتكروها لعل ربنا يهديلهم الحال لما يقرأوها

..................................................................

قال e"من عاد مريضاً لم يزل يخوض في الرحمة فإذا جلس عنده انغمس فيها" صحيح

الموضوع كله بدأ يوم الأربع عند خوخا -واحدة مالخمسة اللي قلتلكم عليهم- في بيتها فقاعدتنا الأسبوعية

خوخا حبيبتي هي اللي كانت بتكلمنا عن ربنا كالعادة ما هي أصلا العلاّمة بتاعتنا 

"... أن يكون الله و رسوله أحب الي العبد مما سواهما, هو أحنا أكيد الحمد لله بنحب ربنا بس هل بنحط اللي ربنا بيحبه قبل اللي أحنا بنحبه وعاوزينه؟؟ يعني مثلا روني ممكن تكون مش بتحب حد من قرايبها جداً ويكون عندها حق بس برده بتكلمهم وممكن كمان تتحمل منهم كلام مش حلو, كل ده لأنها حطت في دمغها أنها بتعامل الله مش الناس..حطت ربنا قبل أى حاجة..و هو ده الأخلاص, الأخلاص....."

من ساعة ما خوخا قالت الكلام ده و أنا مش معها خالص..أنا مش حاسه أني كده خالص..بصيت عليهم كلهم...بجد بحبهم...بس دايما حاسه أنهم بيعملوا كتير قوي لربنا و أنا مش حاسه أني بعمل رسالة عظيمة لخدمة ديني ولا حاجة...

المهم أني فوقت من أفكاري الغريبة دي على خوخا وهي بتخّلص الدرس 

"...وأخيراً يا بنات عاوزكم دايماً تفتكروا أن أحب الأعمال الى الله أدومها و إن قل يعنى ممكن عمل صغير جداً تعمليه و أنتي مخلصة النية قوي لله يكون عنده عظيم جداً ويكون ده هو سبب في دخولك الفردوس الأعلى مش الجنة بس, يا بنات فى واحد دخل الجنة عشان رفع حجر من طريق المسلمين, دخلها لمجرد أن كانت نيته رفع الأذى عن الناس مش عشانهم لكن عشان هم عباد الله."

- "بجد جزاك الله خيراً عنا و ترفعي معنوياتنا كمان يا رب... يلا أنا هروح أساعد طنط." دي كانت روما, قسم الأطعام عندنا, بتموت فالمطبخ

- "تساعديها ولا عاوزه تعرفي أخر الأخبار؟" دي كانت جوجو الطفلة اللي في حياتنا

وكالعادة اللي بينصح خوخا,

- "أيحب أحدكم أن يأكل لحم أخيه ميتاً يا بنات."

- "لأ والله أصل أحنا كنا حكينا لطنط حكاية جوجو وقالت هتقول رأيها المرة دي. أي مش عاوزين تعرفوا؟؟"

على قد ما كان عرض روما مغري لقتني برود عليهم "طيب روحوا أنتم, هتكلم مع خوخا في حوار وهنحصلكم."

و بعد ما رميت على خوخا حبيبتي كل الحاجات اللي كانت بتدور فدماغي, لقيتها بتقولي: 

- "يا روني طبيعي أنك تحسي أنك مقصرة في حق ربنا إذا كان الصحابه نفسهم كانوا بيحسوا كده, سيدنا عمر رضي الله عنه شخصيا لما جاءه الموت كان خايف يدخل النار لدرجة أنه نسي أن الرسول صلى الله عليه وسلم بشره أنه أول من يأخذ كتابه بيمينه. كلنا بنجاهد نفسنا عشان نوصل للأخلاص, هو الموضوع صعب بس متعة وعظيم الجزاء تستحق. و غير كده أنتي بتعملي خير كتيرقوى كفاية أدخال سرور على قلوب الناس وقضاء حوائجهم ده عند ربنا كبير قوي, كفايه أنك بترضي مامتك و باباكي ده تاني أحب الأعمال إلى الله عز و جل

- "أنا عارفه بس لما بشوف كل واحده منكم بلاقي لها عمل لوجه الله بس, علاقة خاصة مع ربنا أنا مش عندي ده."

- "طيب أنتي مش عندك ده لي؟"

- "مش عارفه كسل أو جايز قلّة همه"

- "لو كسل هنبطل و لو قلة همه هنعليها ولا أحنا أي لازمتنا... يبقى أول حاجه هنعملها أنك هتجددي نيتك في كل عمل بتعملي حتى شرب الميه وبعدين هتفكري في أي حاجه نفسك تتعلميها لله, يعني عشان خاطر ربنا بس وتبدأي تاخدي فيها خطوات وعشان الأخلاص وأن العمل مش يقل ثوابه بالرياء وأنا عملت كذا والكلام اللي أحنا عرفينه ده متعرفيش أي حد العمل ده, حتى أحنا. أضحكي بقى بطلي التكشيرة دي مش متعودة عليكِ كده"

.....

- "رانيا تليفون"

- "حاضر يا مامتي"

من يوم الأربع وأنا مش بتكلم مع حد ودماغي وجعتني...أيي العمل اللي ممكن أعميلوا ومحدش يعرفوا؟! ما أكيد هقول لحد... وأيي العمل أصلاً؟؟ لأ أنا لازم أغير جو أو أتجنن مش عارفه بقى.

- "ألو, سلامُ عليكم"

- "و عليكم السلام, أزيك يا رونا"

- "طنط نانو أزي حضرتك و أزي خوخا " مش في حد بيناديني رونا غير مامت خوخا

- "بخير الحمد لله معليش يا رونا كنت عاوزه منك خدمه, ينفع تيجي معايه لواحدة صحبتي تعبانه و عاوزه أزورها و خديجة عندها أمتحان بكره"

- "يا قمر أنت تُأمر هقو ل لماما و نص ساعة و أكون عند حضرتك"

.....

- "أنا قلت أني أخترت الشخصية الصح, مسّلياني طول الطريق مش زي بنتي اللي مش بتتكلم خالص ولما تروح للناس تقعد مكسوفه على جنب, لأ أنا بعد كده مش هروح أي مكان من غيرك"

- "ربنا يخليكي لي يا حُبّي, بس حضرتك ماقولتيش مين صحبتك دي؟"

- "زيزي دي بقى يا ستي صاحبة عمري بس هي كانت العبقرينو اللي فينا يعني هي الوحيدة فينا اللي دخلت هندسه وأتجوزت محمد الله يرحمه كان زميلها في هندسه ودلوقتي هي عندها زي شركة بس شغلها غريب قوي"

- "ليه يا طنطي هي مش بتشتغل شغل هندسه؟!"

- "لأ خالص, دي بتغسل الميتين"

- "....."

- "ماتتخضيش قوي كده أنا عارفه أنك هتحبيها أستني وهتشوفيها حالاً"

.....

بقلنا ساعة ونص قاعدين و بجد أزاي طنط زيزي دي عسوله كده

- "بس يا طنط أنتي عسولة قوي على حوار تغسيل الموتى ده"

- "ربنا يخليكي أنتي اللي قمر والله, كنتي مخبيها فين دي يا نانو..أنتي عارفة أني كنت شبهك قوي زمان بس بعيد عنك يا رب جوزي ربنا يرحمه مات صغير و أنا ساعتها رفضت حد يغسله غيري و فعلاً في يوم أتعلمت و غسّلته و مافيش حد دخل عليه غيري ولما عرفت قد أي الناس عندهم قلة معرفة غريبة توصل للجهل في الموضوع ده قررت أني أفتح المشروع ده عشان يكون صدقة جارية لمحمد ربنا يرحمه"

- "شكل حضرتك حبتيه قوي...ده غالباً جرس الباب خلي حضرتك مستريحة أنا هفتح.......مين؟"

- اللي على الباب : "أنا", دا على أساس أني كده عرفتك خلاص!!!المهم أني فتحت الباب

- "وحضرتك مين؟"

- "رامي, أبن صاحبة البيت إن شاء الله, ممكن أعرف أنتي بقى مين؟"

- "طنط زيزي مش عندها ولاد"

وسعتها طنط زيزي قررت تتكلم وتنقذني قبل ما رامي ده يعمل فيه حاجة

- "مين اللي كان على الباب يا رونا؟"

- "أنا يا ماما", على فكرة كانت بتسألني أنا!!

و طبعاً بصلي بصيت استحقار وراح نحية الحته اللي هما قاعدين فيها... أي قلة الذوق دي و أنا أعرف منين هي قالت مش كان عندها  غير ولد و توفاه الله وعموماً حتى لو أبنها هي ألذ منه بمراحل

- "تعالي يا رونا, نسيت اقولك رامي أبني في الرضاعه"

- " أهلا, أزي حضرتك" بأصغر أبتسامه عندي

- " رونا بقى كانت فكراني حرامي ولا حاجه ومش كانت عاوزه تدخلني", سخييييف

- "رانيا, أسمي رانيا"

- "وأنتي تعرفي ماما منين يا رونا؟", ماشي أنا ممكن أقوم أضربه صح؟!! خصوصاً بالأبتسامه المستفزه اللي على وشه دي قالك يا رونا...هو فاكر نفسه مين؟

- "رونا صاحبة خديجه يا روميو دي في تالته هندسة", روميو!!!حد يقول لأبنو روميو؟؟

- "بجد والله؟ قسم أي؟",أكيد خوخا مش تعرفك و غير كده خليك في حالك...أستغفر الله العظيم

- "عمارة"

- "شغلها حلو للبنات ممكن تبقي تيجي تدربي في المكتب الأستشاري بتاعنا لو عاوزه.", على جثتي

- "دى لو أنا عاوزه أشتغل في هندسة أصلاً"

- "لأ يا روميو أحرجتك"

- لما طنط مامت خوخا لقتني متّنحة قررت تفّهمني: "أصل رامي شايف أن هندسة هي أحسن حاجة في الكون حتى هو و أصحابه فتحوا مكتبهم مع بعض"

- "أنا أصلاً مش متخيل شغل تاني يعني أنتي مثلاً هتشتغلي في أي ؟"

- "عاوزه أفتح المركز الثقافي بتاعي"

- "حلو و أنتي عارفه عاوزاه أزاي يعني؟", هو بيتاريق عليه؟! ماشي ربنا يسمحه عادي يعني لما أفتح المركز بتاعي و مادخلوش يبقى يتاريق براحته..

- "طبعاً أولاً هيكون قسمين للسيدات و للرجال و كل قسم في جزء لكبار السن الناس تستفيد من خبرتهم و في نفس الوقت هما يحسوا أنهم بيفيدوا و جزء ورش صناعات صغيرة للشباب و أخر جزء هيكون لأي حد عاوز يتعلم صناعة صغيرة"

- "وووه بس مش كبير عليكي مشروع زي ده, وغير كده صعب قوي ينجح في بلادنا يعني مثلاً لو هتعملي قلم ب 4 جنيه هتلاقينا بنستورده من الصين بجنيه ولا حاجه"

- حبيبتي طنط زيزي فرحتني وردت عليه: "أمثالك اللي جايبين البلد وراه...هو مش ابني بس ولا يهمك كلامه"

.....

وأنا راجعه طول الطريق مش بفكر في حاجه غير أني لقيت عبادتي الخاصه مع ربنا وكمان مع حد حبيته قوي أنا قررت أتعلم تغسيل الموتى أنا عارفه أنها حاجة تخوف وطنط زيزي شخصياً قالت أنها في الأول كانت خايفة قوي بس كانت هي دي أحسن فترة في علاقتها بربنا وكمان حلو قوي أن الأخره تفضل في بالي دايماً أشوف ناس جاءت ساعتهم فمانساش أن جايز أنا كمان ساعتي أقتربت

وعشان مش أكسل في الموضوع و أنسى كالعادة تاني يوم كلمت خوخا

- "ألو سلامُ عليكم, أزيك يا خوخا عملتي أي في الأمتحان؟"

- "تمام الحمد لله عدى على خير"

- "دايماً رفعه راسنا كده , قولي لي يا خوخا أنتي معكي رقم طنط زيزي؟"

- "صحيح, أنا نسيت أسألك عملتي أي أمبارح ماما كانت مبسوطه جداً و طنط زيزي كلمتني تقول فيكي شعر"

- "بجد؟ أنا كمان حبتها قوي"

- "أنتي سحرت لهم يا بنتي ولا أى حتى رامي اللي عمره ما قال رأيه فأي حد, قال عليكي لذيذة"

- "بجد؟!! حسيته ماحبنيش, هو عموماً القاعدة كانت حلوة قوي لحد ما هو قرر يشرفنا, حاسس بنفسه قوي ربنا يسمحني بس مش حبته خالص"

- "حرام عليكي يا بنتي دى غلبان قوي و محترم جداً أنتي عارفه هو بيراعي مامته من خمس سنين عشان عيانه قوي أنا عمري ما شفت حد بيبر مامته زيه بجد ربنا يبارك له"

- "أي ده أنا شريرة قوي هو عموماً يعني حاسيت طنط زيزي بتحبوه قوي و هي عسوله قوي فأكيد هو كويس المهم عاوزه رقمها"

.....

وعيب عليكم, أول لما قفلت مع خوخا كلمت طنط زيزي علطول...

- "طيب معلش أنا مش هروح المكتب النهارده يا رونا و أنا عاوزه أنا اللي أعلمك بنفسي فممكن نبدأ الأتنين لو فاضيه"

- "حلو قوي بس ينفع بعد الظهر عشان الكليه"

- "خلاص ان شاء الله معلش يا رونا هسيبك عشان رامي هيعدي عليه نروح المستشفى لراويه مامته...تحبي تيجي معانا؟؟"

- "مش عاوزه أتطّفل ولا حاجه بس أنا فعلاً نفسي أشوف حضرتك قوي"

- " تطّفلي أيه بس؟ أنا و رامي حكينالها عنك وهي عاوزه تشوفك أصلاً"

.....

واحنا خرجين من غرفة طنط راويه مش بفكر غير أزاي في حد بيعامل مامته كده بجد ماشاء الله طول ما أنا قاعده مش مصدقه بيعاملها زي بنته الصغيرة ومش بيقول لها غير "يا حبيبي","يا قلبي" و حاجات كده...تعالي يا خوخا شُفي بر الوالدين اللي بجد, مش تقولي عليه ببر مامتي!! عينه اللي كانت السخريه بتنط منها و هو بيبّصلي, دلوقتي مش فيها غير حنّية غريبة

- "مامتك شكلها تعبان قوي, بجد ربنا يشفيها لك"

- "ماما دي دنياتي كلها", بالله عليكم في حد بيعترف بحب مامته كده قدام الناس من غير ما يخاف على شكله قدامهم

- "راويه دي بجد أحسن أنسانه شفتها كفايه أنها سلّمت لقدّرها, بس اللي قلقها أن في ناس مش راضيه تسلم" وراحت طنط زيزي أديت لرامي حتت بصه ولا كأنه عيل صُغير

- "لأ, أستغفر الله أنا أكيد مسّلم أن كلنا هنموت بس أنا مش قادر أتخيل دنيا هي مش فيها", هاه,فظييييييع

- وكالعاده فضولي اللي هيوديني في داهية: "هي عندها أي؟"

- "فيرس c , بس مرحله متأخرة هي أصلاً طول عمرها صحتها ضعيفة عشان كده ماما نانو تبقى مامتي في الرضاعة"

- "...." هو المفروض أقول حاجة ولا أعمل حاجة؟؟ طيب هو يجوز أني أطبطب عليه؟؟

- "يعني مش كنت داخل أسرق شقتها ولا حاجه"

- "أكيد مش ده اللي كان في دماغي ساعتها"

- "سبحان الله حاستك كنتي عاوزه تحدفيني بأي حاجة و تطلعي تجري"

- "أيي ده؟!, أكيد لأ"

- "جايز بس أول مرة شوفتك كنتي في حالة هجوم غريبة"

- طنط زيزي كعادتها من ساعت ماعرفتها قررت تنقذني فالوقت المناسب: "بس يا روميو, أيي الرّخامه ديي؟ سيب البنت في حالها, كسفتها. يالا يا رونا سيبك منه روحي عربيتك و أحنا هنطلع بعدك"

.....

طنط زيزي وفّت بوعدها وفعلاً بدأت تعلمني وبقى لي شهر والحمد لله بقيت علاقتي بربنا حلوة قوي حاسه أن لي عبادتي الخاصه معه و طنط راويه دايماً بتتكلم معايا كلام يشجعني أكتر, هي بقت تعبانه قوي, أخر مره زرتها كان شكلها تعبان قوي و مع ذلك لما الضهر أذّن صّلت و هي قاعدة...كل اللي فكرت فيه ساعتها أن ازاي في ناس أعرفهم ومش بيصّلوا عادي كده والست دي وهي في عز تعبها و بتحاول. بجد بحبها قوي بس أصلاً ماينفعش حد مايحبهاش و رامي كمان بيروح لها كتير قوي كل ما أروح يكون هناك بس بجد أنطباعي الأول عنه أختفى تماماً هو أنا مش بتكلم معه يعني يادوب سلام 

وخلاص بس بجد حاسته حد محترم قوي و طيب و حنيّن قوي علي ماماته الأتنين.

.....

وأنا رايحة لطنط راوية المستشفى أشتكي لها بعد ما طنط  زيزي قالت أني لسه مش مستعده أني أغسّل حد - بجد أنا بقالي 3 أشهر و مستعده جدا يعني -, لقيت رامي قاعد على الأرض قدام أوضيتها, قلبي وجعني

- "سلامُ عليكم", وأول حاجة شفتها لما بصّلي كانت الدموع اللي متحاشه في عنيه, لأ طنط راويه أكيد مش ماتت أنا لسه شيفاها أمبارح

- "دخّلوها العناية المركزة و معيّشنها على الأجهزة و قالوا لي الموضوع مسألة أيام", قالها كأنه بيتكلم كلام حافظه من غير ما يستوعبه وأداني ورقة كانت فأيده, لما فتحتها:

  

        حبيبي و نور عيني روميو :

أنا عارفه أن خلاص ساعتي جاءت

أحلفك بالله اللي أغلى من أي حد أصبر و أحتسب

جايز جزاء صبرك يدخلك الفردوس الأعلى و تخدني معك

قول لزينب أني بدعي الله تكون هي صحبتي في الجنه زي ما كانت نعم الصحبه في الدنيا

و قول لرونا أنها مش أقل من صحبتها عند ربنا بالعكس جايز أكتر و أني لو كنت خلفت بنت مش كنت هرضى بها غير نسخه منها

و قل لها أني مش عاوزه حد يغسلني لما أموت غيرها

                         بحبك

                        أمك راويه

ماحاستش بنفسي غير ورامي بيديني منديل و لقيت أني كنت بعيّط وأنا مش حاسه وكل اللي طلع عليه

- " أنا عاوزه أروح لها, أنا لازم أشوفها" ,هو مش فاهم, أنا بس عاوزه أقولها أن حبها في قلبي زي حب مامتي, أنها غيرت فيه حاجات كتير, أن ماينفعش أنا اللي أغسّلها عشان مش هقدر, أنها سبب من أسباب قربي لربنا قوي دلوقتي, أنها فهمتني في التلات شهور دول أحسن ما مامتي حاولت تفهمني في العشرين سنة اللي فاتوا, أنها هي اللي عرفتني شخصية رامي اللي عمري ما كنت هشوفها وحببتني فيه من غير ما أكون كلّمته كلمتين على بعض.

أول ما شُفتها, لون جلدها غالباً شفاف و كمية الأسلاك اللي متوصللها غريبة و طبعاً مش دخلت لها وقفت ورا الزجاج,و لاقيت نفسي دموعي نازله و بكلمها...

" بحبك قوي و كان نفسي ماما تعرفك و تحبك زى ما أنا حبيتك و بيني و بنيك بحب ابنك عشان هو بيحبك, ربنا يرحمك و يدخلك الجنة بلا سابقة عذاب ولا مناقشة حساب,أمين"

.....

بعد يومين من دخولها العناية المركزة ربنا أخدها عنده و أبدلها دار خير من دارها وأهل خير من أهلها و أنا و طنط زيزي دخلنا نغسّلها وسبحان الله وشها كان مبتسم ولما مسحت وشها الأبتسامه وسعت وطنط زيزي فضلت تقول لها الشهادة  لما جم عشان يخدوها ياخدوها شوفت رامي, فروحت أكلمه:

- "سلامُ عليكم, البقاء لله"

- "ونّعم بالله",لما شُفت شكله كده و صوته اللي مش طالع أصلا ً الكلام مارضاش يطلع

- "أنا عارفه أن أكيد أي كلام هقوله مش هيغير حاجة بس هي كانت عارفة و راضية, أنا مش بقولك ماتزعلش, سيدنا محمد صلى الله عليه وسلمبكى لما أبنه مات أحنا بشر"

- "عليه الصلاة و السلام"

- "هي كانت عاوزاك تصبر, أنت عارف وأنا بغسّلها كان طالع من وشها نور وكانت بتضحك"

- "فعلاً يا حبيبي وكان تغسّلها سهل جداً" طنط زيزي قالتله كده وهي بتاخدوا فحضناها

- "يعني إن شاء الله هي في مكان أحسن , أنا متأكدة أنها هتوحشنا بس أحنا لو بنحبها فعلاً هنفرح لها", ربنا يعلم أني بقول ده لنفسي قد ما بقوله ليه, كأني بأكد لنفسي

- "رانيا أن بجد متشكر...لكل حاجه, لزيارتك ليها, وأنك غسّلتيها زي ما كانت هي عاوزه مع أني عارف أن ده كان صعب, ومتشكر أنك قلتي لي أنها كانت مبسوطة",أخر كلمة طلعت منه كانت مخنوقه بالدموع 

وأنا رحت المطبخ و بجد عيّط عيّاط عمري ما عيّطه قبل كده و ولما روّحت بعد صلاة الجنازه بوست مامتي و سجدت سجدت شكر لربنا أنها لسه معايه

بعد شهرين, كنت الحمد لله غسّلت اتنين كمان غير طنط راوية الله يرحمها, وكنت قاعدة ولقيت طنط زيزي بتكلمني, ودي كانت أول مرة تكلمني بعد موت طنط راوية,

- "رونا, أزيك عملى أي؟ "

- "تمام الحمد لله حضرتك أزيك رجعتي من السفر أمتى؟" ,هي و رامي سفروا بعد العزا على طول

- "لسه من أسبوع, بس رامي كان شاغلني معه جداً ماعلش يا حبيبتي ماسألتش عليكي بس والله كنت دايما بدعيلك بظهر الغيب, أنتي وحشاني قوي", وأنا طنط راويه وحشاني ولما كلمتيني فكرتيني بيها مع أني بروح أتكلم معها كل أسبوع

- "و حضرتك كمان"

- "طيب أنتي فاضيه دلوقتي أعدي عليكي أخدك مشوار؟؟"

- "مش ورايه حاجة, أنا لسه واخده الأجازه أمبارح"

- "خلاص قومي ألبسي و أنا في الطريق"

....

- "خطفاني على فين كده يا طنطي؟"

- "أرض بتاعت حد أعرفه و بيبنيها و حبيت انك تشوفيها ما أنتي عمارة بقى, خلاص أهوه وصلنا الحمد لله"

- "ماشاء الله حلو البيت ده قوي أحساس بيوت المعادي القديمة قوي, أي ده؟ مش ده رامي اللي هناك؟"

- "أه, ما المكتب بتاعه هو اللي مسك المشروع تعالي نسّلم عليه ونخليه يفّرجنا على المكان من جوه"

كأن الواد عنده سنسور, لقيناه جي علينا أول لما نزلنا من العربية:

- "سلامُ عليكم, أزيك يا رونا تفتكري نحط أسم المكان فين؟", ماشي أنا كده متأكده أني بهذي اللوحه الكبيرة اللي ماسكها مكتوب عليها بالعربي و الأنجليزي "مركز رونا للصناعات الصغيرة"

- "ماشي أنتم بتهزروا صح؟!"

- "لأ, دي هدية جوازنا اللي ماما راويه كتبتهالك في وصيتها"

- "جواز مين ؟"

- "هو أنا نسيت أقول لك؟ أحنا هنتجوز بإذن الله و أنا هكلم والدك النهارده بس حبيت اديكي خلفية الأول"

- "طيب أنا حضرتك ممكن أرفض أنت مينفعش تبني مشروع بأكتر من مليون جنيه  لحد ممكن تتجوزه وممكن لأ"

- "أولاً الأرض بتاعت أمي الله يرحمها, ثانياً أنا داخل معاكي شريك بالمباني عشان ماكنش ينفع أسيب مشروع متأكد من نجاحه يروح مني, ثالثاً مين أنا عشان أتجوز واحده غير اللي أمي أختارتها عشان تزّينها لمقابلة ربنا عز و جل, أنا أبقى مجنون لو سبتك, رابعاً أنا مش هتجوز غيرك"

- "...."

....

وبعدين كان الفرح, والتبات والنبات والحجات دي...بالله عليكم ناس أتجوزوا بعد القصة دي, ينفع يبقى في بينهم مشاكل, والله عيب عليهم يدمروا قصة الحب اللي أنا عشتها من طرف تالت =)

وصّلوها لحبيبي

                                                                                                                                                                                                

حبيبي رمضان,

كده تمشي فجأة, يعني حتى مفيش لا ركعتين قبل ما تمشي كده ولا حته أية نخشع فيها سوه, أنت عارف لولا أنك أنت رمضان و أنا بحبك قوي كنت زعلت منك.

المهم, شكرا على هديتك الجميلة فرحتني قوي, لأ مش بتكلم على الهداياة اللي أنت جبتهم لي فالأيام اللي فاتت, أنا بتكلم عن your farwell present...ايوة أنا بتكلم عن العيد, شكرا هديتك فرحتني قوي

 بس عارف أي اللي فرحني أكتر؟؟أن كل سنة كنت دايما و أنت ماشي كنت بسيب معاك حته من قلبي و صدقني بديهالك و أنا عمري ما عاوزك ترجعها بالعكس دا أنا بكون عاوزة أديك حته أكبر... الفرق المرة دي أنك أدتني أنت كمان حته من قلبك...

...يمكن المرة دي متكونش زي أول مرة حبتك, لما كانت لسة مشاعر توبتي جديدة وبريئة وكنت ماسكة فيك كأني عيلة تايهه لقيت أبوها وسط الزحمة

...ولا زي لما رجعت تاني مرة وكنت ساعتها أتعلمت لي حبيتين واستغليت قربك على قد ماقدر كأني كان عندي حرمان عاطفي إيماني

...ولا الكام مرة التانين اللي رجعت فيهم -تصدق أنت بتسبني كتير قوي و أنا مش باخد بالي- كنت وحشني وكان نفسي أشبع منك قوي لدرجة أني كنت بسيب الناس كلها وأقولهم "معلش حبيبي رجع لي بعد غياب"

...بس المرة دي أنت أثبت لي أنك شريني زي ما بيقولوا

هو أنا قلتلك أنك قبل ما تيجي أنا مكنتش عوزاك تيجي؟؟ غالبا لأ...بس أنا كنت خايفة أنك تشوفني المرة دي ومتلقنيش البنوتة اللي مليانة إيمان وطاعات وأمل اللي أنت كنت تعرفها, خفت تبص علية أول ليلة في رجوعك وتشوف فعيني الذنوب اللي عملتها, أنك تشوف قلبي اللي أتغير وفقد برأته...

واللي خفت منه حصل...ما أحنا عشّرة بردوا...بس بدل ما تجري تدي عتق ربنا اللي جيت توصله لناس تانية لقيتك قاعدت معاية كأنك بتقولي " أنا عارف أنك أتغيرتي, بس بنوتي البريئة العابدة لسه موجودة أنا شايفها متخفيش"

وبعدها رحت أديت عتق ربنا لناس, جايز أنا مش كنت منهم أو جايز كنت, بس عارف أنت أدتني حاجة غالية قوي...

عارف ادتني أي؟؟

 ادتني حته من قلبك,

لعلها تطّهر قلبي...

أنت جيت لي بالتوبة اللي كنت خلاص أفتكرتني ماستهيلهاش...

أنت جيت لي بقرأني اللي كنت جبيته قد ماحبيتك وفجأة أنا اللي أتغيرت...

جيت لي بقيامي وكلامي مع ربنا...عارف؟ بحب أفكر أن ربنا أشتاق لعبادتي - سبحانه لا تنفعه طاعة ولا تضره معصية- فبعتك ليه تفّكرني...

جيت لي برسولي اللي كان زمان حياتي كلها, قبل ما يبقى مجرد ذكرى جميلة من أيام بدأت ملامحها تروح,

فكّرتني بكلامه وشوقه لأحبائه اللي كان بيخلي قلبي يرفرف من الفرحة و الحنّية...

بس برضوا أحب حاجة ليه...أنك سبت لي حته من قلبك...متخفش أنا إن شاء الله هحافظ عليها بعينيي كده لحد ما ترجع السنة اللي جاية إن شاء الله وتلاقيني البنوتة اللي تستاهل العتق اللي أنت بتجيبه من عند ربنا.

استودعك الله الذي لا تضيع ودائعه

واحدة بتحبك.............

...إلى نفسي

                                                                                                                                                                                         

نفسي الحبيبة,

أستحلفك بالله متزعليش مني, والله ما عاوزه من الدنيا دي غير نجاتك, عارفة أنا بحبك قوي, وحبّي ده اللي تعبني, ساعات كتير بسمع كلامك و بكون عارفة أنك غلطانة و بشوفك و أنتي بتبصي لي من المراية و بتتصنعي البرأة كأنك طفلة صغيرة بتتحايل على مامتها, و تقولي لي "المرة دي بس, أخر مرة و مش هنعمل كده تاني" و فجأه ألاقي نفسي منساقة وراكي بلا أرادة...

أيوه يا نفسي أنتي بتاخدي أرادتي...كل مرة بتخليني أكل حتة شيكولاتة و أنتي عارفة أني مينفعش أكلها, كل مرة كنتي بتخليني أكلم صديق طفولتي عشان هو واحشك مع أنك عارفة كويس أن ده هيضيقني و هيحسسني بالذنب قدام, كل مرة خلتيني أعمل الذنب اللي أنتي عارفة كويس أني بحبه قوي (ومش هفضحنا قدام الناس) وأستغليتي ده لمتعتك الشخصية مع أنك عارفة أني هبكي بالليل و أني هفضل كام يوم مش عارفة أبصلك في عنيكي سواء لأني مكسوفة من ضعفي أو لأني مخضوضة منك!!

أيوه يا نفسي أنتي بقيتي بتخوفيني...أنانيتك اللي كانت في يوم أنانية طفلة نفسها تفرح أتغيرت و بقيت ترعبني, جنونك اللي كان في يوم منعش دلوقتي أصبح مهلك, ورغم كل ده لسه بحبك...

وحبّي ده اللي بيخليني النهاردة أعلن تمردي عليكي, وقت سيطرتك خلص, أنا عارفة أنك هتزعلي بس والله ما عايزة غير نجاتك...لأ دا أنا مش عاوزة نجاتك بس, دا من حبّي فيكي أنا عاوزة فرحتك, نفسي تفرحي فرحة حقيقية, مش فرحة تتعبني و تأنب ضميرك...

مَنْ عَمِلَ صَالِحًا فَلِنَفْسِهِ وَمَنْ أَسَاء فَعَلَيْهَا وَمَا رَبُّكَ بِظَلَّامٍ لِّلْعَبِيدِ...و أنا من حبّي فيكي عاوزة أعمل عمل صالح بس عشان خاطرك

من حبّي عاوزاكي تقعدي فالجنة, عاوزاكي تتكئي على الأرائك, عاوزاكي تقعدي فقصرك و يخدمك ولدان مخلدون...

بس لو تستّني عليه شوية, و تستحمليني حبتيين...

أنتي عارفة, أنا من حبّي فيكي, عاوزة أخليكي حلوة قوي, عشان لما محمد (صلى الله عليه وسلم) يشوفك يقولك: "يااااه وحشتيني"...محمد يا نفسي, فكراه؟؟؟, أيوه حبيبنا اللي كنت بكلمك عنه قبل ما تتمردي و تروحي تدوري على حبيب فالدنيا...بالله عليكي هتستحملي أن حبيبنا لما يشوفك يقولك "سحقاً, سحقاً, بعداً, بعداً" ؟؟؟

عارفة, من حبّي فيكي عاوزاكي تبقي أطهر و أحسن نفس, عاوزة ربنا ينظرلك و يباهي بيكي ملائكته...عاوزة يوم ما أسيبك و أنام تجري تسجدي عند عرش الرحمن, ما ساعتها هتكوني تستهلي تروحي هناك...بس بالله عليكي أبقي تعالي و احكيلي عن الملأ الأعلى, و أذكريني عندهم بالخير...

قولي لهم "هي اللي زيّنتني و جمّلتني عشان أعرف أجيلكم"...قولي لهم "أنا تعبتها طبعا في الأول, وجه علية وقت كنت عاوزة أحنقها بس بعدها ذقت حلاوة الإيمان فبقيت أنا اللي بشدها للجنة شد لو بس فكرت تبعد"...

طبعا ياختي مستعجلة ماأنتي لمحتي من النعيم الحقيقي لمحة ومن ساعتها وأنتي ملهوفة ومشتاقة....ويا رب تفضلي كده حتى تلاقيه و هو عنك راضي...

---

قال أبو يزيد: «سُقْتُ نفسي إلى الله وهي تبكي، فما زلت أسوقها حتى انساقت إليه وهي تضحك»

رحلة قيام

                                                                                                                                                                                           

القيام أو التراويح أو التهجد أو أياَ كانت أنت بتسميها أي...كنت طول عمري مقتنعة أنها مش بابي...أصل كل واحد ليه باب لربنا...عارف الحته بتعتك اللي فيها علاقتك الخاصة بربنا اللي بتحبها قوي لدرجة أنك بتخاف تتكلم عليها لأنها سرك مع ربنا...بتجري تروحلها و أنت مخنوق لأن عارف أنك أول ما تعملها هتريحك...هتحسسك أن حبيبك بيحبك فيطمئن قلبك

"إذا أردت أن تعرف مقامك فأنظر فيما أقامك"

لو عاوز تعرف أن حبيبك بيحبك شوف هو حطك فين...عشان كده لما بنبعد و نبعد لحد ما الدنيا تضيق علينا قوي بنجري و نعمل عبادتنا السر دي...بس عشان نتأكد أن ربنا لسه عايزنا...أن رغم ذنوبنا وقلة أدبنا فهو لسه بيحبنا و بيشتاق لنا...أنه مستنينا بس نفكر نقرب (يعني حتى مش نقرب...لأ دا أحنا بس نفكر) عشان يدينا صراتنا المستقيم لأ و يمشينا عليه كمان!!! أه ماهو أصل حبيبنا كريم

المهم نرجع للقيام (اللي أنا كنت فكراه مش بابي) أول علاقتي بالقيام كان أني أول معرفتي بالدين و بربنا, حد قالي أن ربنا بيحب القيام و أن اللي مش بيقيم الليل بيكتب عند ربنا من الغافلين عنه فالليلة دي...فبدأت القيام و مش جوايه نية غير أني مستحملش فكرة أني أتحسب غافلة عن ربنا في ليلة...وده كان اللقاء الأول


و من ساعتها بقى ليه معاد ثابت مع القيام, بس كل مرة كنت بحس كأني رايحة أخرج مع عايلة بابايه, حاجة لأزم أعملها و سعات بتبسط فيها بس أغلب الوقت هي واجب لازم يتعمل شأت أم أبيت...


لحد ما في يوم حد عرفني على شخصية القيام الحقيقي...لما قلت للحد ده أني بصلي قيام بس عشان متكتبش من الغافلين

• قالي "عارفة أن اللي يقيم الليل ب 10 أيات مش بيكتب من الغافلين..طيب عارفة أن ركعة الوتر اللي بتصلي بيها بسورة الصمد و المعوذتين دي بتفوق ال10 أيات يعني أنتي لو صلتي الوتر أدخلي نامي خلاص لو هي دي نيتك...بس سؤال هو أنتي بتكلمي ربنا أمتى؟؟"

• و عندك و أنا تنحت "بكلم ربنا أزاي يعني؟"

• "يعني الصبح و الزحمة و الناس حوليكي و مش عارفة تختلي بربنا كده و تكلميه و تشتكيله و تحكيله أو حتى بس تقوليله وحشتني"

• "...."

• "طيب أنتي عارفة أن ربنا كل يوم بينزل إلى سماء الدنيا, بس عشان يقولنا (هل من سأل فأعطيه...هل من تائب فأتوب عليه ...هل من مستغفر فأغفر له)...يعني بينزل عشان عوزك تكلميه و تأنسي بيه...عاوزك تقربي له بس بجسمك و هو هيجيب قلبك, ما أنتي حبيتي مقلب قلوب...حبيبك بيجيلك كل ليلة...هل بقى هو وحشك كفاية أنك تستنيه و تزيني له قلبك"

ومن هنا كان عهدي الجديد بالقيام...كنت بقوم عشان وحشاني الخلوة مع حبيبي...وحشني أني أكلمه من غير ما حد يزعجني...وحشني أني أناجيه بجد

ومع الأسف بعد الوقت ده بكتير جه عهدي التالت و هو أني سبت القيام و أنشغلت بالدنيا عنه, لحد ما فيوم الدنيا أدتني فوق دماغي قوي (هي كان بقالها فترة بتديني, بس اليوم ده زودتها حبتين) فحد شافني و قالي الجملة دي:

"يمكن ربنا بيتقل الدنيا على ضهرك و بيزقك لتحت, عشان بس توطي تسجدي له"

و اليوم ده فعلا رجعت لحبيبي...بالليل و الناس نايمة...و أنا بأنس بحبيبي...و يوميها بس حسيت أزاي أنا بعدت كده, و ده كان اليوم اللي أكتشفت فيه الفاتحة

زمان قبل ما أسيب القيام كنت دايما برّكز قوي في السورة اللي بقرأها بعد الفاتحة وبحاول ألاقي فيها أية تأثر في قلبي
لكن اليوم ده أول ما دخلت فالصلاة حسيت فعلا عظمة الفاتحة...
بصوا معايه:

"الْحَمْدُ لِلَّهِ رَبِّ الْعَالَمِينَ": يا رب ليك الحمد أنك وقفتني بين أيدك الليلة دي و كفى بها نعمه, ليك الحمد على قلبي اللي رغم عصيانه مموتوش, ليك الحمد أنك سببت الأسباب ليه عشان أرجع...ليك الحمد أنك رزقتني أني أحمدك أصلا

"الرَّحْمَنِ الرَّحِيمِ": أكيد ما اصل ده مش مقامي و مع ذلك أنت خلتني فيه...ما أنا مستهلش بكاء بين أيدك ولا مناجاه بس أنت رحيم...كفاية حفظك ليه و أنا بعصاك ما أنت رحمن...كفاية أن أنت خلقتني أمتك (عبدتك يعني)...و فوق كل ده كفاية أنت أنت ربي =)

"مَالِكِ يَوْمِ الدِّينِ": فعلا مالك, بقوتك و عظمتك دي كلها, جبتني و أنا راضيه, و لو شأت لجبتني و أن كسيرة مذلولة لدنيا...راجعة بس عشان عاوزة حاجة من دنيا رايحة...لأ دا أنت سبحانك جبتني مشتاقة ملهوفة...بجري عشان وحشني حبيبي

"إِيَّاكَ نَعْبُدُ وإِيَّاكَ نَسْتَعِينُ": ودي فعلا مايحسهاش غير اللي بعد و تعب...عارف لما حد يطبطب عليك و يقولك أطمن...فعلا أزاي جالي قلب أبعد عن أعنتك و أنا نفاسي اللي جي مش هيطلع غير لما أنت تأذن...فعلا مليش غيرك

" إهدِنَا الصِّرَاطَ المُستَقِيمَ": ياااااااه, والله ما هيرجعني عليه غيرك, عارفة أنك كريم قوي أنك توقفني بين أيدك و عارفة أنك هترجعني عالصراط و عارفة أن أكتر حاجة وحشاني فالصراط ده هي رضاك...

"صِرَاطَ الَّذِينَ أَنْعَمْتَ عَلَيْهِمْ غَيْرِ الْمَغْضُوبِ عَلَيْهِمْ وَلاَ الضآلين": لأ دا مش أي صراط كمان, صراط ناس أنا عارفة كويس أن لولا كرمك و فضلك و جودك ماكنتش أستحق أكون معاهم

بس أنتم عارفين اي أحلى حاجة في الفاتحة؟؟؟

أن ربنا بيعلمنا فيها ندعوه أزاي...

عارف -وطبعا لله المثل الأعلى- لما تعلم ابنك أول كلمة أو أزاي يعمل حاجة وتحس بالفخر...سألت نفسك ابنك حاسس بأيه...حاسس بحب كبير قوي و تعظيم فظيع...ما بالك بملك الملوك اللي بيباهي ملائكته بعباده الصالحين...بالله عليك مش بتحس بقلبك مش مساعيك من كتر الحب...

الموضوع ده كله عشان الليلة دي دخلت في مرحلة جديدة فعلاقتي بالقيام...الليلة دي ربنا رضاني قوي...ووراني حلاوة إيمان أنا ماستهلهاش و عمري ما حاستها قبل كده

لأ ده كمان علمني...سبحان الله كان كتاب بقالي كتتتييير قوي مفتحتوش, بفتح درفة المكتبة وقع و أتفتح على صفحة "قيام الليل" و فيها مكتوب الدعاء ده:

" اللهم لك الحمد أنت نور السموات والأرض ومن فيهن، ولك    

الحمد أنت قيم السموات والأرض ومن فيهن، ولك الحمد أنت 

رب السموات والأرض ومن فيهن، ولك الحمد أنت ملك 

السموات والأرض ومن فيهن، ولك الحمد لك ملك السموات 

والأرض ومن فيهن، ولك الحمد أنت الحق، ووعدك الحق، 

وقولك الحق، اللهم لك أسلمت وبك آمنت، وعليك توكلت، 

وإليك أنبت، وبك خاصمت، وإليك حاكمت، فاغفر لي ما قدمت 

وما أخرت، وما أسررت وما أعلنت، أنت المُقدّم و أنت 

المؤخر، لا إله إلا أنت ولا حول ولا قوة إلا بك "

يا الله

---

أحديث هتعجبكوا:

1.     عَنْ عَبْدِ اللَّهِ بْنِ عَمْرِو بْنِ الْعَاصِ , قَالَ : قَالَ رَسُولُ اللَّهِ صَلَّى اللَّهُ عَلَيْهِ وَسَلَّم : " يَا عَبْدَ اللَّهِ , لا تَكُنْ مِثْلَ فُلانٍ ، كَانَ يَقُومُ اللَّيْلَ فَتَرَكَ قِيَامَ اللَّيْلِ " . صَحِيحٌ 

2.     روى مسلم في صحيحه عن أبي هريرة أن رسول الله قال: "إذا مضى شطر الليل أو ثلثاه، ينزل الله إلى السماء الدنيا فيقول: هل من سائل يعطى؟ هل من داع يستجاب له؟ هل من مستغفر يغفر له؟ حتى ينفجر الصبح".

3.     حديث عليّ رضي الله عنه أن النبي صلى الله عليه وسلم قال : إن الله وتر يحب الوتر فأوتِرُوا يا أهل القرآن . رواه الإمام أحمد وأبو داود والترمذي والنسائي وابن ماجه

ربك رب قلوب

                                                                                                                                                                                           

الليلة دي و أنا بقرأ القرأن, أستوقفتني أية يمكن عديت عليها أكتر من 50 مرة طوال ال 12 سنة اللي فاتوا (و أيوة أنا بدأت أقرأ القرأن من وانا عندي 10 سنين..عادي يعني كان عندي صعوبات تعلم و كبرت دخلت هندسة...بتحصل) المهم أي هي الأية؟؟

وقال إني ذاهب إلى ربي سيهدين رب هب لي من الصالحين فبشرناه بغلام حليم 

[ ص: 89 ]

كنت طول عمري بستغرب ليه إبراهيم يكون هو خليل الرحمن؟

 يعني مثلا ليه مش نوح اللي قعد يدعوا قومه 950 سنة؟

 ولا ليه مش موسى اللي اليهود عذبوه؟؟ كل شوية يقولك "عوزين صنم نعبده" و يكون ربنا عاملهم لسه معجزة...جبروت جبروت يعني...

و لا ليه ميكونش خليل الرحمن أدم ما هو أبونا كلنا و هو اللي ربنا صنعه بأيده أصلا و نفخ فيه من روحه و أسجد له ملائكته؟؟؟

بس أول لما شفت الأية...كل اللي حسيتوه... أيه اليقين ده؟؟!!...يعني وقت إبراهيم مش كان في ولا بني أدم موحد و مع ذلك هو مانسقش وراهم, لأ دا فكر لحد ما دماغه وجعته و قعد يدور على ربه في كل حاجة حوليه...ومع أنه ماشفش ربه في الأخر بس كان عنده يقين أنه موجود

...

بص بقى للأية, بص أولها "وقال إني ذاهب إلى ربي سيهدين" اللي هو أنا مليش دعوة بكل العالم دول...أنا عارف أني لو رحت له هو هيهديني...يقين مبيهزرش

و بص بقى حلاوة اللي يروح لربه

 "رب هب لي من الصالحين فبشرناه بغلام حليم"

يا رب أنا عاوز كذا... علطول فبشرناه...ما أنت روحتله خلاص...يبقى هي دي معاملة رب العالمين و ملك الملوك الكريم ذو الجود و الفضل و المنه

عرفت ليه إبراهيم كان أمه (رجل واحد بأمه كاملة) عرفت ليه هو خليل الرحمن؟؟؟

لأنه جاء ربه بقلب سليم....

زي ما رسولك صلى الله عليه و سلم قال:

(ما سبقهم أبو بكر بكثرة صلاة ولا صيام ، ولكن بشيء وَقَـرَ في قلبه)

و فعلا ربك رب قلوب

اللهم أرزقنى قلب مثل قلب إبراهيم...اللهم أزل سخائم صدورنا...اللهم أزل الران من 

عليها...أمين يا رب العالمين

أخيرا حبيبتي رجعتلي

                                                                                                                                                                                             

                                                                                                                                                                                      

يا حبيبتي أنا ممكن أفرح؟

يعني أنا من حقي أحلم؟

طول عمرك جوه قلبي

طول عمري كنت حاسة,

أني لسه ليه مكان في قلبك.

قالوا: "أمشوا..مصر ماتت من زمان"

قالوا: "أمشوا..الكويس في البلد دي ملوش مكان"

بس أنتي يا حبيبتي, كان ليكي رأي تاني

خدتي رجالتك في حضنك في ثواني

يا قلبي, يا نور عنيه

أحميهم و أنصريهم

ومالخونه أحفظيهم

يا غالية قوي عليه

نفسي أضمك بين أدايه

مين كان يصدّء

أن ولادك يعملوها

و مالحرمية يطهروها

و "سلمية" يخلوها

أحميهم و أنصريهم

و مالخونه أحفظيهم

يا حبي وحشتني أصالتك

يا قلبي من زمان
 وأنا كان نفسي أشوفك

واخده أخيرا مكانتك

يا رب =)

                                                                                                                                                                                                                                                                                

جمد قلبك شوية يا قلبي

و أعرف أن بحالك عالم ربي...

لا سفينة دايماً راسية

ولا قلوب الناس دايماً قاسية...

بكرة تلاقي قلب يحبك و يخاف عليك

و من عيون الناس في قلبه يخبيك...

لكن أزاي عاوز نكسب

و أنت من الأول رافض تلعب

قوم أتحرك و شوية أتعب

بدل ما غيرك في أرضك يزرع

و بعدين يجي بالغالي يبعلك...وعجبي.